Ubutumwa bwa Bikira Mariya bukomeje kuba umurage

Tariki 15 Kanama Kiliziya Gatolika ku Isi hose yizihiza umunsi mukuru wa Asomusiyo, umunsi wizihizwa buri mwaka ku rwego rw’isi mu guha icyubahiro Bikira Mariya. U Rwanda rukaba rwizihirije uyu munsi i Kibeho, aho abakirisitu bateraniye banibuka amabonekerwa y’ubutumwa yatanzwe kuva mu 1981.

Padiri François Harelimana, ushinzwe ingoro ya Bikira Mariya i Kibeho, yasobanuye ko kuwa 28 Ugushyingo 1981, Bikira Mariya yatangiye kubonekera abakobwa batatu: Alphonsine Mumureke wari ufite imyaka 16, Anathalie Mukamazimpaka, na Marie Claire Mukangango.

Alphonsine yabonye Bikira Mariya bwa mbere mu cyumba cy’amafunguro, yumva ijwi rimuhamagara rigira riti: “Mwana wanjye.” Yakomeje kumutega amatwi ubwo Bikira Mariya yamubazaga ati: “Ni nde ukunda cyane?” aho yasubije ko akunda Imana na Bikira Mariya wabyaye Yezu.

Anathalie Mukamazimpaka nawe yabonekeye Bikira Mariya guhera mu 1982 kugeza 1983, aho yibwiraga amasengesho, kwiyoroshya no kwitanga.

Marie Claire Mukangango yatangiranye amabonekerwa mu 1982, maze akabonerwa ubutumwa bwo kwamamaza urukundo no gukangurira abantu gusenga no guhinduka.

Benshi mu baturage bo mu karere ka Nyaruguru bagaragaje ubuhamya bw’ukuntu ayo mabonekerwa yahinduye ubuzima bwabo.

Aline Uwimana, waje i Kibeho n’umuryango we, yagize ati: “Nabonye ibyishimo no guhumurizwa n’amasengesho n’amabonekerwa ya Bikira Mariya. Byanyigishije kwicisha bugufi no gukunda abandi mu buzima bwanjye bwa buri munsi.”

Kiliziya Gatolika yemeje aya mabonekerwa nyuma y’ubushakashatsi bw’abaganga n’abahanga mu by’Imana ndetse n’igenzura ry’Inama y’Abepiskopi bo mu Rwanda na Roma.

Kuva icyo gihe, Kibeho yabaye isoko y’ubukerarugendo nyobokamana, aho ibihumbi by’abakirisitu baturutse hirya no hino ku Isi baza gusenga no kwiyegereza Imana.

Uyu munsi wa Asomusiyo ni ikimenyetso cyo guha icyubahiro Bikira Mariya no kwibutsa abantu akamaro ko gusenga, kwiyoroshya no gukunda abandi nk’uko uyu mubyeyi w’ijuru yabitwigishije.