U Rwanda na RDC byatangiye urugendo rushya rw’ubufatanye mu bukungu
U Rwanda na Repubulika Iharanira Demokarasi ya Congo (RDC) byafashe indi ntambwe mu rugendo rwo gushimangira umubano wabyo, bishyiraho amahame azagenga ubufatanye mu by’ubukungu, ku wa 1 Kanama 2025.
Iyi gahunda ishingiye ku masezerano y’amahoro ya Washington yasinywe ku wa 27 Kamena 2025, afashijwe gushyirwaho na Leta Zunze Ubumwe za Amerika. Aya mahame ni yo azashingirwaho mu gutegura amasezerano y’ubufatanye mu bukungu hagati y’ibihugu byombi.
Minisiteri y’Ububanyi n’Amahanga ya Amerika yatangaje ko aya mahame azibanda ku guteza imbere ubukungu n’imibereho y’abaturage, binyuze mu bufatanye mu bice bitandukanye birimo:
- Ingufu n’ibikorwaremezo
- Ubucukuzi bw’amabuye y’agaciro
- Ubuzima n’ubukerarugendo
- Kugenzura no kurengera pariki z’ibihugu
Minisitiri w’Ububanyi n’Amahanga n’Ubutwererane w’u Rwanda, Ambasaderi Olivier Nduhungirehe, yasobanuye ko ibihugu byombi bigamije gusinya amasezerano yihariye mu by’ubukungu mu bihe biri imbere.
Yagize ati: “Azaba amasezerano yihariye y’ubufatanye mu kongerera agaciro amabuye y’agaciro n’ibindi bikorwa by’ingenzi. Turizera ko impuguke zizumvikana ku buryo bwiza bwo kuyashyira mu bikorwa.”
Mbere yo gushyiraho aya mahame, ku wa 31 Nyakanga habaye inama ya mbere y’urwego rushinzwe kugenzura iyubahirizwa ry’amasezerano y’amahoro, yabereye i Washington, hakaba hateganyijwe indi izaba ku wa 4 Kanama 2025.
Iyo nama izibanda ku gukurikirana ibikorwa byo gusenya umutwe w’iterabwoba wa FDLR no kugabanya ingamba z’ubwirinzi u Rwanda rwashyize ku mipaka yarwo.
Amerika yatangaje ko izi nama zombi ari intambwe ikomeye iganisha ku bufatanye bukomeye mu by’umutekano no mu bukungu, ishimangira ko u Rwanda na RDC biri mu nzira nziza yo kubaka amahoro arambye.