Impinduka zisanzwe mu gitsina cy’umugore zishobora guteza indwara ishobora gutera ubugumba, nk’uko ubushakashatsi bubigaragaza
Abashakashatsi bo muri Ositaraliya basohoye ibyavuye mu bushakashatsi bushya bugaragaza ko indwara yitwa Bacterial Vaginosis (BV), nubwo isanzwe itarafatwaga nk’indwara yandurira mu mibonano mpuzabitsina, ishobora gukwirakwira binyuze mu mibonano hagati y’abashakanye cyangwa abakundana, kandi ishobora kugira ingaruka zikomeye zirimo n’ubugumba.
Ibi byagaragajwe mu bushakashatsi bwatangajwe mu kinyamakuru cy’abahanga mu buvuzi, New England Journal of Medicine, aho bagaragaje ko kuvura bombi—umugore n’uwo baryamana—byatanze umusaruro ufatika mu kugabanya kwisubiramo kwa BV, bikaba byarafashije n’abakobwa bagira ibibazo by’imyororokere kenshi.
BV ni iki?
BV ni indwara iterwa no guhungabana kw’utunyabuzima dusanzwe dutuye mu gitsina cy’umugore. Iyo turengeje urugero, dutera ikintu kimeze nk’amavangingo atandukanye n’asanzwe, ashobora kuba y’umweru, ajya gusa n’amazi cyangwa se ashashagirana, rimwe na rimwe akanagira impumuro mbi imeze nk’iy’amafi.
Nubwo igaragara cyane, igice kinini cy’abagore bafite BV ntibabona ibimenyetso, ibyo bikaba bituma bamwe batayimenya igihe kirekire. Gusa, iyo idavuwe neza ishobora gutera izindi ngaruka zirimo ubugumba, gukuramo inda, ndetse n’impfu z’abana bavutse.
Uburyo bwo kuyivura
BV ivurwa n’imiti y’ibinini cyangwa se amavuta y’imbere (crème). Ariko ubushakashatsi buheruka bwerekanye ko kuvura umugore wenyine bidahagije. Icyiza ni ugutanga imiti kuri bombi—umugore n’uwo baryamana—bityo bigafasha kugabanya indwara no kwirinda ko yagaruka.
Abashakashatsi bakoze igerageza ku bashakanye 164, aho bamwe bavuwe bombi naho abandi bavurwamo umwe gusa. Icyagaragaye ni uko mu gihe bavuraga bombi, indwara yagabanutseho 50%, byatumye n’iryo gerageza rihagarikwa kare kuko impinduka nziza zigaragaraga bitunguranye.
BV yaba ari indwara yandurira mu mibonano mpuzabitsina?
Nubwo mu myumvire y’abantu benshi BV itafatwaga nk’indwara yandurira mu mibonano mpuzabitsina (STI), Porofeseri Catriona Bradshaw, umwe mu bayoboye ubu bushakashatsi, avuga ko ubu buryo bushya bwo kuvura bwerekanye ko indwara ikwirakwizwa n’uwo mwaryamanye, bityo bikaba bisaba ko ivurwa nk’izindi ndwara zandurira mu mibonano.
Ati: “Twabonye ko abagore barwara kenshi BV bayandurira ku bo baryamana, ibi bikaba bigaragaza ko ari ngombwa ko tuyishyira mu cyiciro cy’indwara zandurira mu mibonano mpuzabitsina.”
Kugeza ubu, ubushakashatsi bukomeje gukorwa hifashishijwe uburyo bw’ubumenyi bushingiye ku turemangingo (genomic sequencing), kugira ngo hamenyekane neza ubwoko bwa bagiteri butera BV n’uburyo ikwirakwira.
Impinduka mu buvuzi
Ikigo cya Melbourne Sexual Health Centre cyatangaje ko cyamaze guhindura imikorere, aho cyatangije uburyo bushya bwo kuvura abagore bafite BV, ndetse n’abagabo babo.
Nayo British Association for Sexual Health and HIV, ishinzwe kurwanya indwara zandurira mu mibonano n’icyorezo cya SIDA, yashimangiye ko aya makuru mashya ashimangira ko BV ikwiye kwitabwaho nka STI, kuko bigaragara ko ikunda kugaruka ku bantu basubiranamo cyangwa bari mu mibanire idahinduka.
Ubutumwa ku baturage
Abagore bagaragaza ibimenyetso bihindagurika mu gitsina cyangwa bakeka ko baba barwaye BV, barasabwa kwegera amavuriro yita ku buzima bw’imyororokere cyangwa se abaganga babihuguriwe, kugira ngo bafashwe mbere y’uko indwara igira ingaruka zikomeye ku buzima bwabo.