Ibiciro ku masoko byazamutseho 7,3% muri Nzeri 2025

Ikigo cy’Igihugu cy’Ibarurishamibare (NISR) cyatangaje ko muri Nzeri 2025, ibiciro ku masoko byazamutseho 7,3% ugereranyije na Nzeri 2024. Ibi bivuze ko ubuzima bw’abaturage bwahenze kurushaho ugereranyije n’umwaka ushize, kuko muri Kanama 2025 izamuka ryari ku gipimo cya 7,1%.

Iri zamuka ry’ibiciro ryatewe ahanini n’ibicuruzwa byo mu buzima bwa buri munsi, cyane cyane iby’ibiribwa n’ibinyobwa bidasembuye byazamutseho 4,2%, mu gihe ibinyobwa bisembuye n’itabi byiyongereyeho 15%. Ibiciro by’iby’ubukode, amazi, amashanyarazi, gazi n’ibindi bicanwa nabyo byiyongereyeho 4,1%.

Ikindi kigaragara ni uko mu rwego rw’ubuvuzi habayeho izamuka rikabije ry’ibiciro ku kigero cya 71,1%, mu gihe serivisi z’ubwikorezi zazamutseho 8,6%, naho amafunguro n’icumbi byiyongeraho 17,7%.

Iyo ugereranyije ibiciro by’ibicuruzwa bitarimo ibiribwa n’ibikomoka ku ngufu, byiyongereyeho 8,9% hagati ya Nzeri 2024 na Nzeri 2025.

Ugereranyije Nzeri 2025 na Kanama 2025, naho hagaragaye izamuka rya 1,4%, bitewe ahanini n’izamuka ry’ibiciro by’ibiribwa n’ibinyobwa bidasembuye (+1,3%), iby’amazu n’amashanyarazi (+1,9%) ndetse n’ibiciro by’uburezi byazamutseho 11,5%.

Abasesengura ubukungu bavuga ko iri zamuka ry’ibiciro rifitanye isano n’imihindagurikire y’ikirere, izamuka ry’ibiciro ku isoko mpuzamahanga ndetse n’ingaruka zigaragara ku bikenerwa bya buri munsi nk’amavuta, ibiribwa n’ingendo.

Ibi byose biri mu bituma inzego z’ubuyobozi zisabwa gukomeza kugenzura isoko no gushyiraho ingamba zigamije kurinda abaturage ingaruka z’izamuka ry’ibiciro, cyane cyane ku bicuruzwa by’ibanze.