BAL 2025: Kivumbi King na Ariel Wayz bazasusurutsa abafana
na: J. Christian IHIRWE
Guhera ku wa 17 kugeza ku wa 24 Gicurasi 2025, u Rwanda ruzakira imikino y’itsinda rya Nile Conference mu irushanwa rya Basketball Africa League (BAL) ku nshuro ya gatanu, izabera muri BK Arena i Kigali. Iyi mikino izaba ari umwanya wo kwishimira siporo n’umuziki, aho abahanzi Kivumbi King na Ariel Wayz bazasusurutsa abafana mu gihe cy’imikino.
Mu makipe azitabira iyi mikino harimo APR BBC ihagarariye u Rwanda, iri kumwe na Al Ahli Tripoli yo muri Libya, Nairobi City Thunder yo muri Kenya, na Made by Basketball yo muri Afurika y’Epfo.
Iri rushanwa rizaba riherekejwe n’ibitaramo by’abahanzi bazwi mu Rwanda no muri Afurika. Kivumbi King na Ariel Wayz bazaririmba mu gihe cy’akaruhuko k’imikino, bazana umwihariko w’umuco n’umuziki nyafurika.
Abifuza kwitabira iyi mikino bashobora kugura amatike binyuze kuri Ticqet.rw cyangwa ku rubuga rwa BAL (bal.nba.com).
Kuva mu 2020, u Rwanda rwakiriye imikino ya nyuma ya BAL inshuro enye zikurikirana. Binyuze mu bufatanye na BAL, u Rwanda ruzakomeza kwakira imikino ya nyuma kugeza mu 2028, binyuze mu masezerano y’imikoranire hagati ya BAL n’Ikigo cy’Igihugu Gishinzwe Iterambere (RDB).
Iyi mikino izaba ari umwanya mwiza wo kwishimira impano z’abakinnyi n’abahanzi, ndetse no gukomeza guteza imbere ubukerarugendo n’ubukungu bw’igihugu.