Yanenze ibyo gushyiriraho Ukraine umubare ntarengwa w’abasirikare

Perezida w’u Bufaransa, Emmanuel Macron, yatangaje ko adashyigikiye icyifuzo cy’u Burusiya cyo kwemerera Ukraine kugira ingabo nke kandi zigenwe ku buryo bw’amasezerano. Ibi yabivugiye i Washington DC, aho yari aherekeje Perezida Volodymyr Zelensky mu biganiro yagiranye na Perezida wa Leta Zunze Ubumwe za Amerika.

U Burusiya bwari bwatangaje ko mu gihe cyose hagirana ibiganiro bigamije kurangiza intambara, hakwiye gushyirwamo ingingo yemerera Ukraine kugira umubare muto w’abasirikare ndetse no kudahabwa uburenganzira bwo kwinjira mu muryango n’imikoranire y’ibihugu byo mu Burengerazuba.

Macron we yabigarutseho avuga ko ibyo bidakwiye: “Ukraine ikeneye uburenganzira bwo kugira igisirikare gikomeye, gifite ubushobozi bwo guhangana n’igitero icyo ari cyo cyose. Gushyiraho imipaka ku ngabo zayo ni ukuyambura ubusugire n’umutekano wayo.”

Yakomeje ashimangira ko iki gihugu kigomba guhabwa ubushobozi bwo kugira ibihumbi byinshi by’abasirikare ndetse kikakomeza kwakira intwaro zo kwirwanaho. Yavuze ko kubyima ibyo burenganzira byaba ari ugufasha u Burusiya mu migambi yabwo yo kongera kwigarurira u Burayi bwose.

Ibi bitekerezo bye ntibihura n’ibya Donald Trump, wahoze ari Perezida wa Leta Zunze Ubumwe za Amerika, usaba Ukraine guhagarika imirwano, ikemera kugirana ibiganiro n’u Burusiya ndetse ikaba yiteguye kurekura ibice byayo byigaruriwe.

Macron ari mu bakomeje kugaragaza ko amahoro ya nyayo atagerwaho mu gihe Ukraine yaba yambuwe ubushobozi bwo kwirwanaho. Ku bwe, ibyo u Burusiya busaba si inzira y’amahoro, ahubwo ni uburyo bwo gushyira iki gihugu mu bucakara bw’igisirikare cya Moscow.