U Rwanda rwiyemeje kugabura ibishyimbo byongerewe intungamubiri mu bigo by’abanyeshuri
Minisiteri y’Ubuhinzi n’Ubworozi (MINAGRI) ifatanyije na Minisiteri y’Uburezi (MINEDUC) yatangaje gahunda nshya isaba ibigo by’amashuri gutangira guha abanyeshuri ibishyimbo byongerewe intungamubiri, mu rwego rwo kurwanya imirire mibi no gufasha abana gukura neza.
Ibi bishyimbo bikize ku butare na zinc, bikaba byitezweho gufasha abana mu mikurire, mu mikorere y’ubwonko ndetse no kongera imbaraga z’umubiri. Biteganyijwe ko bizatangira guhabwa ibigo byose mu mwaka w’amashuri wa 2025/2026 uzatangira muri Nzeri.
Gahunda yo gukoresha ibi bishyimbo yashyizwe mu bikorwa bwa mbere muri 2024 binyuze mu mushinga Sustainable School Feeding Innovations in Kigali (SSFI). Uwo mushinga umaze kugera ku bana barenga ibihumbi 277 biga mu mashuri 195 yo mu Mujyi wa Kigali. Raporo iheruka yerekanye ko 73% by’amashuri yamaze gutegura imirima yihariye yo guhinga ibi bishyimbo.
Sam Ngabire, umukozi muri MINEDUC ushinzwe gahunda yo kugaburira abanyeshuri, yavuze ko ibigo byinshi byamaze kubona imbuto ndetse bimwe bitangiye kuzihinga. Yagize ati: “Iyi gahunda yatangiye gutanga umusaruro, ibigo byinshi byatangiye kwihingira ibishyimbo bigamije kubifashisha mu mirire y’abana.”
Minisitiri w’Ubuhinzi, Dr Mark Cyubahiro Bagabe, yashimangiye ko ibishyimbo byongerewe intungamubiri biri mu murongo mugari wo guteza imbere ibihingwa bifite umusaruro mwinshi kandi bifasha kuziba icyuho cy’imirire. Ati: “Turi guharanira ubuhinzi bugezweho butanga umusaruro, butanga intungamubiri kandi burwanya indwara.”
Mu Rwanda, ibishyimbo bifatwa nk’ifunguro ry’ingenzi, aho umuntu umwe akoresha ibilo 34 ku mwaka. Guverinoma ikaba yizeye ko iyi gahunda nshya izazamura ubuzima bw’abana ndetse ikarandura ikibazo cy’imirire mibi mu mashuri.