Musanze: Ba Ofisiye 108 barimo abaturutse mu bihugu 19 basoje amasomo y’icyiciro cya 13 mu Ishuri Rikuru rya Gisirikare
Ku gicamunsi cyo kuri uyu wa Mbere, tariki ya 16 Kamena 2025, mu Karere ka Musanze hateguwe umuhango ukomeye wo gusoza amasomo y’icyiciro cya 13 mu Ishuri Rikuru rya Gisirikare rya RDF, rizwi nka Command and Staff College, riri i Nyakinama.
Uyu muhango wayobowe na Minisitiri w’Intebe w’u Rwanda, Dr. Edouard Ngirente, witabirwa n’abayobozi batandukanye b’inzego za Leta, abahagarariye inzego z’umutekano n’imiryango y’abasirikare barangije amasomo.
Ofisiye 108 ni bo basoje amasomo, barimo 78 bo mu Ngabo z’u Rwanda (RDF), 2 bo muri Polisi y’u Rwanda, 2 bo mu Rwego rw’Igihugu rushinzwe Imfungwa n’Abagororwa (RCS), ndetse na 26 bakomoka mu bihugu 19 by’inshuti z’u Rwanda, birimo n’ibihugu by’Abarabu nka Jordanie.
Muri aba banyeshuri, 73 bahawe Impamyabumenyi y’Icyiciro cya Gatatu cya Kaminuza mu bijyanye n’Umutekano (master’s in security studies), bakaba basoje urugendo rw’amasomo rwamaze ibyumweru 47 yibanze ku bijyanye n’imiyoborere, ubusesenguzi bw’imirwano, no gutegura ibikorwa bya gisirikare ku rwego rwo hejuru.
Brig. Gen Andrew Nyamvumba, Umuyobozi w’iri shuri, yavuze ko amasomo bahawe yateguwe ku buryo ashyira imbere ubushobozi bwo gusobanukirwa imikorere y’ingabo zitandukanye, ubufatanye bw’ibihugu mu bya gisirikare, n’imitegurire y’intambara z’iki gihe.
Yagize ati:
“Uru rugendo rwafashije cyane aba basirikare kunoza ubumenyi bwabo mu gusesengura ibintu no kuyobora, binyuze mu myitozo ibatoza gukorana kinyamwuga no gutekereza ku rwego rw’amayeri ya gisirikare, aho biri ngombwa cyane mu ntambara z’iki gihe.”
Uretse amasomo y’imiyoborere, buri cyiciro kirangizwa hanatangwa amasomo y’iminsi 14 y’ikoranabuhanga azwi nka International Computer Driving License (ICDL), agira uruhare mu kongerera aba basirikare ubushobozi mu gukoresha ikoranabuhanga mu nshingano zabo za buri munsi.
Guhera ubwo iyi gahunda yatangiraga, abasirikare 563 bamaze gusoza aya masomo y’icyiciro cya gatatu, barimo Abanyarwanda 420 n’abandi 143 bakomoka mu bihugu bitandukanye by’inshuti z’u Rwanda.
Ubuyobozi bw’iri shuri bwatangaje ko hari gahunda yo kuryagura no kuryongeramo ubushobozi, kugira ngo rihuze n’icyerekezo cy’igihugu mu kongerera ingabo z’u Rwanda n’iza bagenzi babo mu karere ubushobozi bujyanye n’igihe.
Uru ni urundi rugero rugaragaza uko u Rwanda rukomeje kwiyubaka binyuze mu mahugurwa y’imbitse, afasha mu gutegura abayobozi bashoboye mu nzego z’umutekano n’umutekano mpuzamahanga.
