King James agiye kwizihiza imyaka 20 amaze mu muziki: Igitaramo gikomeye kiri gutegurwa
Umuhanzi King James, umwe mu bakunzwe cyane mu Rwanda, yateguje igitaramo cyihariye kizaba kigamije kwizihiza imyaka 20 amaze mu rugendo rw’umuziki. Ni mu gihe ari no mu bahanzi 7 bamaze kwemezwa ko bazitabira ibitaramo bya MTN Iwacu Muzika Festival bizazenguruka Igihugu guhera mu kwezi kwa Nyakanga.
Mu kiganiro cyihariye yagiranye na IGIHE nyuma y’inama n’abanyamakuru yo gutangiza iriya festival, King James yatangaje ko iyi myaka 20 amaze mu muziki ayibonamo igice gikomeye cy’ubuzima bwe kandi agiye kuyizihiza bifatika, ahereye ku bikorwaremezo bya MTN Iwacu Muzika Festival.
Ati: “Ndashaka kubegera, twishimane”
King James yavuze ko ari gutekereza ku gikorwa gikomeye kizabera i Kigali nyuma yo kuzenguruka mu ntara, aho azategura igitaramo cyihariye cy’imbonekarimwe. Yongeraho ko ashaka no kugera ku bakunzi be bo mu bindi bihugu.
Ati:
“Uretse icyo nteganya gukorera i Kigali, ndi no gutekereza gukora ibitaramo bizenguruka mu bihugu binyuranye nizihiza imyaka 20 maze mu muziki. Ntabwo ari ibintu byoroshye kumara icyo gihe cyose ukora ibintu abantu bishimira, ni yo mpamvu numva nshaka kubegera tukishimana.”
Nubwo atatangaje itariki nyirizina y’igitaramo kizabera i Kigali, King James yavuze ko bizamenyekana neza nyuma y’urugendo rwa MTN Iwacu Muzika Festival.
Ni bande bazafatanya na King James muri iyi festival?
Mu bahanzi bazazenguruka Igihugu muri MTN Iwacu Muzika Festival harimo:
- King James
- Riderman
- Juno Kizigenza
- Ariel Wayz
- Kevin Kade
- Kivumbi King
- Nel Ngabo
Itariki n’aho bazataramira
- 5 Nyakanga 2025: Musanze
- 12 Nyakanga 2025: Gicumbi
- 19 Nyakanga 2025: Nyagatare
- 26 Nyakanga 2025: Ngoma
- 2 Kanama 2025: Huye
- 9 Kanama 2025: Rusizi
- 16 Kanama 2025: Rubavu