Impinduka zikomeye ku mahoro: Loni yashimye intambwe ya RDC na M23 mu gushyira iherezo ku ntambara
Mu gihe hakiri umutekano muke mu Burasirazuba bwa Repubulika Iharanira Demokarasi ya Congo (RDC), inkuru nshya yasize icyizere gishya mu mitima y’abaturage: Leta ya RDC n’umutwe wa AFC/M23 basinye Ingingo z’Amahame y’Ubwumvikane zigamije gushyiraho umusingi w’amasezerano arambye y’amahoro.
Umunyamabanga Mukuru w’Umuryango w’Abibumbye (Loni), António Guterres, yatangaje ko ashimira impande zombi zateranye muri Doha, muri Qatar, zikagera ku bwumvikane. Iri sinywa ryavuzweho nk’intambwe ikomeye iganisha ku gutuza k’u Burasirazuba bwa Congo hashize imyaka myinshi harangwa ubwicanyi, ubujura, iyicarubozo no gusahura.
“Nishimiye isinywa ry’izi ngingo hagati ya Leta ya Congo n’umutwe wa M23. Loni izakomeza gushyigikira imbaraga zigamije amahoro, kurinda abaturage no kongera ituze muri RDC,” ni ko Guterres yabivuze.
Ingingo zasinyiwe i Doha zatangiye guha icyizere abaturage
Amasezerano yashyizweho umukono hagati ya RDC na AFC/M23 yashyigikiwe n’ibihugu by’inshuti n’imiryango mpuzamahanga, harimo Leta ya Qatar n’indi miryango y’akarere. Ayo masezerano afatwa nk’urufunguzo rushobora guhindura amateka y’intambara mu Burasirazuba bwa Congo, aho abaturage babaye mu bwoba n’ubuhunzi imyaka myinshi.
Abasesenguzi bavuga ko iki ari igihe cy’ingenzi cyakwifashishwa n’impande zombi mu kwubaka icyizere gishya, harimo guhagarika imirwano, gusubiza abaturage mu byabo, gutanga ubufasha ku barokotse, no kuvugurura inzego z’umutekano.
Ubutumwa bwa Loni bwagaragaje ko uyu muryango uzakomeza gukorana n’ubuyobozi bwa Congo, cyane cyane mu bikorwa byo kurinda uburenganzira bwa muntu, kubaka ubushobozi bw’inzego za gisivile n’umutekano no gufasha abaturage bo mu duce twibasiwe n’intambara kongera kwiyubaka.
Ubu butumwa buzamura icyizere mu gihe ubuyobozi bwa Congo ndetse n’imiryango mpuzamahanga yahoranaga impungenge ko ibikorwa bya M23 bigiye kongera gukaza umurego nyuma y’igihe kitari gito cy’ubwumvikane bucye.
Ariko se, iyi ntambwe nshya izahindura ibintu? Bizaterwa n’uko ayo masezerano azubahirizwa, ubushake bwa politiki bw’impande zombi n’uruhare rw’abafatanyabikorwa barimo Loni.
