Freddy Kaniki wa AFC yagizwe perezida w’umutwe Twirwaneho ukorera muri Kivu y’Amajyepfo

Freddy Kaniki Rukema, usanzwe ari Visi Perezida ushinzwe ubukungu n’imari mu ihuriro AFC (Alliance Fleuve Congo) rirwanya ubutegetsi bwa Repubulika Iharanira Demokarasi ya Congo, yagizwe Perezida w’umutwe witwaje intwaro MRDP-Twirwaneho ukorera mu Ntara ya Kivu y’Amajyepfo.

Umuvugizi w’uyu mutwe, Kamasa Ndakize Welcome, yatangarije itangazamakuru ku wa 1 Nyakanga 2025 ko iki cyemezo cyafashwe n’abanyamuryango b’umutwe ku wa 18 Mata 2025, kandi kemezwa n’akanama k’inararibonye.

Uyu mutegetsi mushya aje ku buyobozi bwa MRDP-Twirwaneho nyuma y’uko uyu mutwe winjiye mu ihuriro AFC, byakurikiye urupfu rwa Brig Gen Michel Rukunda alias Makanika, wahoze ari umuyobozi w’uyu mutwe, wishwe muri Gashyantare 2025.

Mu rwego rwo gukomeza kunoza imiyoborere n’imirimo ya gisirikare, MRDP-Twirwaneho yanatangaje abandi bayobozi bashya barimo:

• Brig Gen Charles Sematama, wagizwe Visi Perezida wa mbere ushinzwe ibikorwa bya gisirikare n’umutekano, akaba ari na Umugaba Mukuru w’abarwanyi b’uyu mutwe.
• Alexis Mugisha, wagizwe Visi Perezida wa kabiri ushinzwe imiyoborere, politiki na dipolomasi.
• Adele Kibasumba, wagizwe Umunyamabanga Mukuru.

Uyu mutwe witwaje intwaro MRDP-Twirwaneho ukorera cyane cyane mu Ntara ya Kivu y’Amajyepfo, ndetse uzwi mu bikorwa by’imirwano n’indi myigaragambyo igamije guhangana n’ubutegetsi bwa Kinshasa. Kwinjira kwawo muri AFC byitezweho guhuza imbaraga z’imitwe itandukanye irwanya Leta ya RDC.