Bugesera yiteguye guhindura isura y’u Rwanda binyuze mu mishinga 10 y’icyerekezo 2050

Nk’uko byagaragajwe n’Ikigo cy’Igihugu gishinzwe imikoreshereze y’ubutaka (NLA), gahunda nshya y’ikoreshwa ry’ubutaka muri Bugesera igamije kubaka iterambere rirambye kugeza mu mwaka wa 2050. Alexis Rutagengwa ushinzwe igenamigambi muri NLA avuga ko 85.1% by’abaturage ba Bugesera bazaba batuye mu midugudu igezweho mu 2050, mu gihe umubare w’abaturage witezwe kuzikuba inshuro ebyiri, uva ku 551,000 mu 2022 ukagera kuri miliyoni 1.2.

Dore imishinga 10 iri guhindura isura ya Bugesera:

1. Ikibuga cy’indege mpuzamahanga cya Bugesera
   Kirimo kubakwa muri Rilima, kizakira abagenzi miliyoni 8 buri mwaka, kikazagera kuri miliyoni 14. Gitwaye miliyari 2.2$, kikaba ari ryo shoramari rinini riri gutuma Bugesera igaragazwa nk’irembo mpuzamahanga ry’u Rwanda.
2. Umujyi w’ikoranabuhanga uzengurutse ikibuga
   Smart Airport City izaba igizwe n’amaresitora, inganda, amashuri y’abapilote n’ibikorwaremezo byo mu rwego rwo hejuru. Uyu mujyi uzaba igicumbi cy’iterambere rishingiye ku bucuruzi n’ikoranabuhanga.
3. Gari ya moshi n’imihanda yihuta
   Imihanda y’icyitegererezo izahuza Bugesera n’ibindi bice by’igihugu, hanubakwe inzira ya gari ya moshi ihuza n’ikibuga cy’indege. Bizoroshya ingendo n’ubwikorezi bw’ibicuruzwa.
4. Parike y’ubwikorezi n’ububiko bw’ibicuruzwa
   Ahantu hihariye hazubakwa habikwa ibicuruzwa, harimo n’ibikenera ububiko bukonjesha. Ibi bizafasha abahinzi n’aborozi kugera ku isoko mpuzamahanga.
5. Ahazabera isiganwa rya Formula 1
   Umuhanda wa F1 ugiye kuzamurwa hafi y’ikibuga cy’indege, bizazamura ubukerarugendo. Hazanavugururwa Stade ya Bugesera n’ibikorwaremezo by’imikino.
6. Imijyi igezweho n’icyaro cy’icyitegererezo
   Imidugudu ifite ibikorwa byose by’ibanze, icyaro kigezweho kirimo inzu, ubuhinzi bugezweho, ahakorerwa imirimo n’ahantu ho kuruhukira bizazamurwa.
7. Kuhira imisozi n’ibishanga
   Hifashishijwe ikoranabuhanga, hazakorwa ibikorwa byo kuhira ahantu hatandukanye harimo imirenge ya Mwogo, Musenyi, Shyara, Juru n’ahandi, hagamijwe kongera umusaruro w’ubuhinzi.
8. Agace k’inganda zikomeye ku buhinzi
   Special Economic Zone ya Gashora izaba igizwe n’inganda zitunganya umusaruro w’ubuhinzi, ikazamura agaciro k’ibikomoka ku Rwanda.
9. Akarere kihariye k’ubukerarugendo
   Uduce twihariye dushingiye ku biyaga, amahoteli, n’ahantu ho kwidagadurira tuzatezwa imbere. Bugesera izaba igicumbi cy’ubukerarugendo bushingiye ku mazi.
10. Amashuri n’ibigo by’amahugurwa y’icyitegererezo
    Hazubakwa ibigo by’imyuga, amashuri ya tekiniki n’ubumenyingiro, byose bigamije gutegura urubyiruko ku isoko ry’umurimo rishingiye ku bumenyi.