APR BBC yatsinze Patriots BBC mu mikino ya kamarampaka
Mu mukino ukomeye wa ½ cya kamarampaka ya Shampiyona y’Igihugu y’Icyiciro cya Mbere muri Basketball, APR BBC yatsinze Patriots BBC ku manota 85 kuri 73, bigatuma amakipe yombi anganya intsinzi imwe kuri imwe.
Uyu mukino wa kabiri wabaye ku Cyumweru tariki 22 Kamena 2025 muri BK Arena, aho APR BBC yari isabwa gutsinda kugira ngo ikomeze guhatanira itike yo kugera ku mukino wa nyuma, mu gihe Patriots BBC nayo yashakaga intsinzi kugira ngo igire amahirwe yo kujya imbere muri iyi mikino ikinwa mu buryo bwa Best of Five.
Uko umukino wagenze:
- Agace ka mbere: Amakipe yombi yatangiye atsindana ku muvuduko, gace karangira Patriots BBC iri imbere ku manota 21-19.
- Agace ka kabiri: Amakipe yagiye agabanya imbaraga, amanota aba make. APR BBC yaje kurangiza igice cya mbere iri imbere n’amanota 46-41.
- Agace ka gatatu: Patriots yagarukanye imbaraga, ariko APR BBC isubirana ikizere ku munota wa nyuma, irangiza aka gace iri imbere n’amanota 67-57.
- Agace ka kane: Patriots BBC yagerageje kugabanya ikinyuranyo, ikagera ku manota 70-66, ariko APR BBC yakomeje kubaka amanota kugeza umukino urangira ku 85-73.
Imibare y’abakinnyi bahanzwe amaso:
- Antino Alvarez wa APR BBC yatsinze amanota 29, akora na rebound 9.
- Axel Mpoyo wa Patriots BBC yatsinze amanota 27, akora na rebound 7.
REG BBC nayo yegukanye intsinzi ya kabiri:
Mbere y’uyu mukino, REG BBC nayo yari yakinnye na UGB BBC, iyitsinda ku manota 96-84, bituma ifata intambwe ikomeye igana ku mukino wa nyuma.
Imikino ikurikira:
Umukino wa gatatu muri kamarampaka uteganyijwe ku wa Gatatu tariki 25 Kamena 2025 muri BK Arena:
- REG BBC vs UGB BBC: Saa 12:00
- APR BBC vs Patriots BBC: Saa 20:30
Iyi mikino irakomeje gukinwa mu buryo bwa Best of Five muri ½, mu gihe umukino wa nyuma uzakinwa Best of Seven.
