Abakinnyi 11 beza ba Shampiyona y’u Rwanda 2024/2025: Ubuhanga bwashimangiwe n’imibare
Shampiyona y’u Rwanda ya 2024/2025 irasatira umusozo wayo, aho hasigaye umukino umwe gusa kugira ngo irangire ku mugaragaro. APR FC yamaze kwegukana igikombe, ariko hari abandi bakinnyi bagaragaje urwego rwo hejuru rudasanzwe, ndetse ibikorwa byabo byashimangiwe n’imibare.
Nyuma y’isuzuma ryimbitse n’isesengura ryakozwe n’itsinda ry’abanyamakuru b’imikino, dufatanyije n’ibitekerezo by’abafana, hatangajwe ikipe y’abakinnyi 11 beza baranze Shampiyona y’uyu mwaka. Aba bakinnyi bahize bagenzi babo mu mwanya bakinamo, haba mu bwugarizi, hagati no mu busatirizi.
1. Umunyezamu: Ssebwato Nicholas (Mukura VS)
Uyu munyezamu w’Umunya-Uganda yakinnye imikino 26, arinda izamu rye adatsinzwe mu mikino 13. Yatanze kandi imipira ibiri yavuyemo ibitego, agaragaza ubuhanga mu gusoma umukino no gutangiza uburyo bw’ataque.
2. Myugariro iburyo: Uwumukiza Obed (Mukura VS)
Yakinnye imikino yose ya Mukura VS, atanga imipira ine yavuyemo ibitego. Azwiho imbaraga, kwihuta no gufasha cyane mu bijyanye n’ubusatirizi.
3. Myugariro hagati: Niyigena Clément (APR FC)
Yakinnye imikino 28 kuri 29, atsinda ibitego bitatu. Uyu musore agaragaza ubushishozi, gutuza no kuyobora abandi mu bwugarizi.
4. Myugariro hagati: Youssou Diagne (Rayon Sports)
Uyu Munya-Senegal yakinnye imikino 22 atsinda ibitego bitatu. Afite ubunararibonye n’imbaraga zidasanzwe mu guhangana n’abatari bake mu busatirizi.
5. Myugariro ibumoso: Niyomugabo Claude (APR FC)
Yakinnye buri mukino wa APR FC, agira uruhare mu bwugarizi butinjiza ibitego. Azwiho kwitanga, gutanga imipira no kwihangana mu bihe bikomeye.
6. Umukinnyi wo hagati uca inyuma: Joseph Sackey (Muhazi United)
Uyu Munya-Ghana yakinnye imikino 22, atsinda bitatu, anatanga indi ine. Ni umwe mu bakinnyi batunguranye uyu mwaka, kubera uburyo yafatanyaga n’ab’inyuma akanagaburira ba rutahizamu.
7. Umukinnyi wo hagati: Ruboneka Jean Bosco (APR FC)
Yakinnye imikino 27, atsinda bibiri anatanga imipira itandatu yavuyemo ibitego. Azwiho gutuza no guhindura umukino mu buryo bwihuse.
8. Umukinnyi wo hagati: Muhire Kevin (Rayon Sports)
Kapiteni wa Rayon Sports, nubwo yavuye mu kibuga imikino ine kubera imvune, yagize uruhare mu bitego 14 harimo kimwe yatsinze ubwe. Ni intyoza mu guhuza umukino no guhanga uburyo.
9. Rutahizamu: Umar Abba (Bugesera FC)
Mu mikino 22 yakinnye, yatsinze ibitego 14 anatanga imipira ine yavuyemo ibindi. Yerekanye ko Bugesera FC yagiraga umuyobozi mu busatirizi.
10. Rutahizamu: Fall Ngagne (Rayon Sports)
Nubwo atasoje umwaka kubera imvune, yatsinze ibitego 13 mu mikino 13, anatanga undi umwe. Ni umwe mu bakinnyi bafite impano yihariye mu gutungurana no gutanga umusaruro mu gihe gito.
11. Rutahizamu: Djibril Ouattara (APR FC)
Mu mikino 14, yatsinze ibitego 12. Yinjiriye APR FC mu gice cya kabiri cy’umwaka, ariko agaragaza impinduka zikomeye mu mikino yishyuwe.
Umutoza w’umwaka: Darko Nović (APR FC)
Nubwo yatandukanye na APR FC mbere y’uko umwaka urangira, Darko Nović yayifashije gutsinda imikino 17 mu 27 yayitoje, ayifasha kwegukana igikombe cya Shampiyona. Uburyo bw’imikinire ye, imiyoborere n’ukuntu yazamuye urwego rw’abakinnyi bituma ahabwa iyi nshingano y’icyubahiro.
APR FC ni yo yegukanye igikombe cya Shampiyona y’uyu mwaka n’amanota 64 mbere y’umunsi wa nyuma. Rayon Sports iri ku mwanya wa kabiri n’amanota 60, igomba guhura na Gorilla FC.