SIDA irakataje mu basirikare b’u Burusiya bari ku rugamba muri Ukraine

Ubwandu bwa SIDA mu basirikare b’u Burusiya bari mu ntambara muri Ukraine buriyongera ku muvuduko udasanzwe, nk’uko bigaragazwa na raporo nshya ya Minisiteri y’Ingabo y’u Burusiya.

Iyi raporo, yasuzumiwe n’urubuga Carnegie Politika, yagaragaje ko kuva u Burusiya bwatangira intambara muri Ukraine muri Gashyantare 2022, umubare w’abandura agakoko gatera SIDA mu ngabo zacyo wiyongereye inshuro nyinshi ugereranyije n’imyaka ibanza.

• Mu gihembwe cya mbere cya 2022, abanduye biyongereye inshuro 5 ugereranyije na 2021.
• Umwaka wa 2022 wose warangiye abanduye biyongereye inshuro 13.
• Mu gihembwe cya mbere cya 2023, abanduye biyongereye inshuro 4 ugereranyije n’igihe nk’icyo cya 2022.
• Umwaka wa 2023 warangiye abanduye bikubye hafi inshuro 20 ugereranyije n’igihe mbere y’intambara.

Impamvu z’iyiyongere ry’ubwandu

Minisiteri y’Ingabo y’u Burusiya ivuga ko ubwandu bushya bukunze guterwa n’imibonano mpuzabitsina idakingiye, gukoresha inshinge zidasukuye kwa muganga no kwanduzanya mu gihe cy’ibikomere by’intambara.

Mu ngabo z’u Burusiya, umusirikare wanduye SIDA ntashobora kwinjira mu gisirikare, ariko iyo ari ku rugamba ntemererwa gusubira mu rugo. Ibi bivuze ko abarwaye bakomeza kwitabira ibikorwa bya gisirikare.

U Burusiya mu bihugu bya mbere ku isi mu bwandu bushya

Ishami ry’Umuryango w’Abibumbye rishinzwe kurwanya SIDA (UNAIDS) ryerekana ko guhera 2022, u Burusiya buri mu bihugu 5 bya mbere ku isi mu kugira abantu bandura agakoko gatera SIDA ku bwinshi.

Mu bantu miliyoni 1,5 banduye ku isi mu 2022, u Burusiya bwihariye 3,9%, inyuma ya Afurika y’Epfo, Mozambique, Nigeria n’u Buhinde.

Ibi bigaragaza ko intambara n’ubuzima bubi ku rugamba bishobora kuba byihutisha ubwandu, mu gihe Leta itarashyiraho ingamba zihamye zo kurinda abasirikare n’ingo zabo.