Niger yemeje ko yishe umuyobozi wa Boko Haram

Igisirikare cya Niger cyatangaje ko cyishe Ibrahim Mahamadu, uzwi cyane ku izina rya Boukura, wari umaze imyaka irenga icumi ayoboye umutwe w’iterabwoba wa Boko Haram. Iki gikorwa cyabereye ku Kirwa cya Shilawa, mu gace ka Diffa, ahazwi nk’ahantu uyu mutwe ukunze guhungira nyuma yo kugaba ibitero mu bihugu bituranye.

Mu itangazo ryasohowe n’igisirikare, ryemeje ko iki gitero cyagabwe mu gitondo cyo ku wa 15 Kanama 2025, aho indege z’intambara zateye ibisasu bitatu ku birindiro bya Boukura muri Shilawa.

“Mu gitondo cyo ku wa 15 Kanama, igisirikare cyacu cyagize igikorwa cyihariye cyarangiye gihitana Boukura n’abamuri hafi,” niko iri tangazo rivuga.

Boukura yari yarafashe ubuyobozi bwa Boko Haram nyuma y’urupfu rwa Abubakar Shekau mu myaka irenga 13 ishize.

Boko Haram yatangiye ibikorwa byayo mu 2009 muri Nigeria, ariko nyuma yaho itangira kugaba ibitero mu bindi bihugu byo mu karere birimo Niger, Tchad na Cameroun.

Umuryango w’Abibumbye (ONU) utangaza ko ibikorwa by’uyu mutwe byahitanye abasivili barenga ibihumbi 40, mu gihe abandi barenga miliyoni ebyiri bavuye mu byabo kubera imirwano n’ibitero byawo.

Iyi ntsinzi y’igisirikare cya Niger ije mu gihe ibihugu byo mu karere bikomeje ibikorwa byo guhashya imitwe y’iterabwoba igamije guhungabanya umutekano, cyane cyane mu bice bikikije Ikibaya cya Tchad, aho Boko Haram n’indi mitwe ikorera kenshi.