Elon Musk yicuza bimwe mu byo yavuze kuri Donald Trump

Elon Musk, umuherwe wateye inkunga ikomeye ibikorwa byo kwiyamamaza bya Donald Trump mu matora ya 2024, yavuze ko yicuza amagambo amwe yamuvuzeho mu gihe bari mu makimbirane ku mbuga nkoranyambaga. Abinyujije ku rubuga rwe rwa X, Musk yagize ati: “Byararengereye cyane.”

Ibi bije nyuma y’uko Trump, mu kiganiro yahaye New York Post, agaragaje ko yiteguye ubwiyunge, nubwo yumva yaratengushywe na Musk. Trump yavuze ko atamufitiye inzika kandi ko yizera ko Musk yicuza ibyo yavuze.

Umwuka mubi hagati yabo watangiye ubwo Musk yavuye mu rwego rwari rushinzwe kunoza imikorere ya leta (DOGE), anenga umushinga w’itegeko rya Trump rijyanye n’imisoro, awita “ishyano”. Yanasabye abaturage guhamagara intumwa zabo ngo uwo mushinga wimwe amahirwe, avuga ko ushobora guteza ihungabana ry’ubukungu.

Muri urwo ruzinduko rw’amagambo, Musk yavuze ko Trump yaba yaravuzwe muri dosiye zijyanye na Jeffrey Epstein, ibyo ibiro bya Perezida byahakanye. Trump nawe yamushinje gusuzugura ibiro bya Perezida, avuga ko ibyo Musk yakoze ari “ibintu bikomeye kandi byubaka inzitizi.”

Nubwo hashize igihe gito Musk asabye ko Trump yeguzwa, biragaragara ko hari amahirwe mashya y’ubwiyunge hagati yabo. Visi Perezida JD Vance yavuze ko yizeye ko “Elon azagaruka mu muryango,” nubwo yemeza ko byasaba igihe.

Abenshi mu banyapolitiki b’aba-Republika basabye ko bombi biyunga, mu gihe abo mu ishyaka ry’Abademokarate bo barebera hafi uwo mubano udasanzwe hagati y’aba bagabo babiri bakomeye mu gihugu.