Ambasaderi wa Palestine mu Muryango w’Abibumbye, Riyad Mansour, yaturitse ararira mu Nteko ya Loni asaba guhagarika ubwicanyi muri Gaza
Ambasaderi wa Palestine mu Muryango w’Abibumbye, Riyad Mansour, yagaragaje amarangamutima menshi ubwo yavugaga ijambo rihangayikishije mu Nteko Rusange ya Loni i New York, asaba guhagarika ubwicanyi bukomeje gukorerwa abaturage b’inzirakarengane muri Gaza.
Mansour, wari ufite ikiniga, yavuze ko abana b’Abanya-Palestine barenga 3,000 bamaze kwicwa n’ibitero bya Israel kuva ku ya 7 Ukwakira 2023. Yagize ati: “Nta mwanya wo kuririra abacu dufite, kuko urupfu rukomeje kwiyongera.” Yongeyeho ko 70% by’abishwe ari abagore n’abana, asaba ko isi yose ihagurukira guhagarika ubu bwicanyi.
Yibukije amagambo y’umuganga w’Abanya-Palestine, Dr. Mahmoud Abu Nujaila, wigeze kwandika ku kibaho cyo mu bitaro bya Al Awda mbere y’uko yicwa n’igitero cya Israel mu 2023: “Uzaba asigaye ku iherezo azavuga inkuru. Twakoze ibishoboka byose. Muduhore mu mitima yanyu.” Aya magambo, Mansour yayasomye arira, asaba ko isi idakomeza kurebera ubwicanyi bukorerwa Abanya-Palestine.
Mansour yanenze bikomeye uburyo isi ifata ubusumbane mu guha agaciro ubuzima bw’Abanya-Israel kurusha ubw’Abanya-Palestine, avuga ko nta mpamvu n’imwe yatuma ibitero ku basivile byemerwa. Yasabye ko habaho agahenge k’ako kanya, kandi ko umuryango mpuzamahanga udakomeza kurebera ibibera muri Gaza.
Yavuze ko ibitaro, abakozi b’ubuvuzi, n’abatanga ubufasha bagirwa intego z’ibitero, ndetse ko kuba Umu-Palestine ubwabyo bihagije ngo yicwe. Yasabye ko Loni n’ibihugu bigize akanama k’umutekano bifata ingamba zihutirwa zo guhagarika ubu bwicanyi no gutanga ubufasha bwihuse ku baturage ba Gaza.
Mansour yasabye ko akanama k’umutekano ka Loni gasura Gaza kugira ngo kabone n’amaso yabyo ibibazo bikomeye abaturage baho bahura nabyo, harimo ubwicanyi, inzara, n’isenywa ry’amazu. Yavuze ko Abanya-Palestine bakeneye ubutabera n’amahoro, kandi ko isi idakwiye gukomeza kurebera.
Iri jambo rya Mansour ryatumye benshi mu bari mu nteko bagira amarangamutima, bamwe banarira, ndetse ryatumye hatangizwa ibiganiro bikomeye ku rwego mpuzamahanga ku bijyanye n’uburenganzira bwa muntu n’uruhare rwa Loni mu guhagarika amakimbirane.
Ubu, amaso ya benshi ari kuri Loni n’ibihugu bikomeye, bibaza niba koko bizagira icyo bikora kugira ngo ubwicanyi muri Gaza buhagarare, cyangwa niba bizakomeza kurebera.
Ibikorwa bya Mansour byerekanye ko ijwi ry’Abanya-Palestine rishobora kumvikana ku rwego mpuzamahanga, kandi ko isi idakwiye gukomeza kwicecekera imbere y’akarengane.